Јунајтед и Сити: Шокирани сме од терористичките напади

357

Фудбалски клубови од Манчестер, Јунајтед и Сити, изразија сочувство до семејствата на загинатите во терористичкиот напад по концертот на американската пејачка Аријана Гранде.

Британската полиција објави дека при терористичкиот напад на бомбашот самоубиец загинаа 22 лица, а повредени се 59 во преполната арена.

– Ние сме шокирани од ужасните случувања изминатата ноќ во „Манчестер Арена“. Нашите мисли и молитви се со оние кои беа погодени од несреќа, се наведува на официјалниот Твитер профил на Манчестер Јунајтед.

На социјалните мрежи играчите на двата тима, Винсент Компани и Џеси Лингард, како и УЕФА и Фудбалската асоцијација на Англија изразија жалење поради терористичкиот акт.

– Со големо жалење слушнавме за ужасот во Арена. Нашите срца се со сите засегнати од нападот, порачуваат од Манчестер Сити.

Нападот во Манчестер се случува во пресрет на утрешното финале во Лига Европа помеѓу Јунајтед и Ајакс во Стокхолм.

loading...